MIMPI KETUAI BANSA DAYAK IBAN KE TAU KAYAU DULU KELIA

MIMPI KETUAI BANSA DAYAK IBAN KE TAU KAYAU DULU KELIA

Nyadi kitai bansa Dayak Iban tu siti ari raban bansa ke arap bendar ka pengawa bemimpi rambau dulu kelia. Lalu ba cherita tu aku ka ngenang ngagai bala pemacha iya nya maioh macham bengkah mimpi ketuai bansa Dayak Iban ke kala didinga sereta ditemu balat beberita tau kayau tau mulau rambau dulu kelia.
Lalu ba cherita tu mega aku ka ngenang madah ka sekeda pengawa bansa Dayak Iban rambau ka dulu kelia. Nyadi bansa Dayak Iban tu sigi endang arap bendar ka semoa utai ti manah enggau utai ti jai nya nemu ka datai nyadi nitih ka peneka atur petara magang. Lalu sida iya mega arap ka petara ulih madah ka gaya utai ti ka nyadi ba sida nya ngena jalai sekali ka ari ngena mimpi tauka ari ke ngena burong nyadi ka laba sida ngereja pengawa.
Kelia menya leboh maia rambau bansa Dayak Iban beguna ka pemerani ati ka dikena sida iya nurun mansang ngayau tauka ka ngiga jereki ka tau mai pemanah ke sida iya diau ngidup ka diri, sida iya suah bendar ngereja pengawa ke dikumbai orang nampok ba tuchong bukit ke tinggi ti endang ditemu sida iya beberita bisi antu diau nguan ba tuchong bukit nya. Lalu sida iya mega kala ngereja pengawa nampok tu ba kaki wong enggau maioh alai bukai ke endang disangka tauka udah kala ditemu sida bisi antu nguan. Sida iya mega kala tak semina nganjong diri empu tindok aja ngagai endor ke ka alai nampok nya tadi ketegal laban alai nya nadai antu nguan tauka antu ba endor nya enggai datai nulong sida ia. Nyadi sida iya ke mansang nampok kia sigi mai rengka piring enggau ading, awak ka antu tauka petara ba endor nya ka datai lalu bisi utai dipakai.

Nyadi bansa Dayak Iban ke bidik lansik, tampak jelu tulong antu, dikelala petara nulong nyengenda kala betemu lalu dipadah ka sida Keling, sida Bunga Nuing, sida Laja sida Bunga Jawa, sida Sempurai, sida Ngelai nyadi ketuai ke tau matak serang maia nurun ngayau. Lalu bisi mega sida nya semina tau naka nyadi ketuai kayau, ketuai mulau, tauka nyadi orang ti ke tau bulih padi betanam ubi enggau nyadi orang ke tau bulih tajau, bulih mau. Pia mega ari pengawa ka beburong tu sida iya tau mega mudah bulih dengah sereta ngangkat ka nama diri laban bulih reta bulih tengkira, bulih padi, mujor pegi, lalu pia sekali ka bidik lansik maia ke nurun pegi belayar ke luar nengri enggau ngereja getah.
Lalu pia mega aku ngari ka niang Benedict Sandin ti nyadi pengarang cherita tuai tu ba taun 1962 ti dikumbai iya Tiga Belas Bengkah Mimpi ti bisi ditampong lalu ditulis aku ngambi ka bisi ka penemu bala maioh ke bekena ka internet nitih ka singkang pemansang kemaia tu hari. Lalu pia mega enda dilengka ka ba jako kenang aku, iya nya semoa bengkah mimpi ka ditusoi ditu sereta dikeingat ka orang ti nusoi ngagai iya, iya nya baka niang Mujah anak Mambang, ti datai ari menoa Penom, Paku; niang Busok anak Gerijih ti datai ari menoa Entanak, Betong; niang Tuai Rumah Libau anak Penghulu Garan ti datai ari menoa Paku; niang Selaka anak Budin ti datai ari menoa Stambak Ulu, Betong; niang Umpi anak Penghulu Rantai ti datai ari menoa Awik, Saratok enggau niang Tom Harrisson ke gawa nyadi Curator Sarawak Museum ka udah nyukong iya ngereja sereta nulis surat tu kelia.